De La Villa Espinaréu a la foz del Monte Muñacos
El domingu 17 d’abril de 2005 xuntámonos con un grupu de socios y collacios de XEGA y compañeros del Conceyu Abiertu del Llar Solidariu pa facer la ruta de les foces del Ríu Infiernu y del Monte Muñacos ente los conceyos de Piloña y Casu.
Depués de parar a almorzar en L’Infiestu, tuvimos qu’entamar la ruta dende La Villa Espinaréu porque a la choferesa metióse-y na testera que l’autocar nun pasaba ente dos cases… ¡Lo que nos cagamos n’ella cuando llegamos al pueblu siguiente, Rifabar, y nos adelanta un autocar enllenu guiris!
Depués de pasar Espinaréu (y cuntar dellos horros y paneres) y Rifabar, dexamos atrás l’asfaltu y empecipiamos la ruta siguiendo’l Ríu Infiernu, nomáu asina dende la Edá Media pola violencia de les sos agües y la oscuridá y misteriu que tresmite.
Pasamos pol área recreativa de La Pesanca ente castañales, carbayos y abedurios y fontes nes que l’agua sabe a agua.
D’equí p’alantre parez que’l Nuberu apiadóse de nos y empezó a estenar la poca borrina qu’entá quedaba cuando llegamos.
Idíliques les cabañes de Degoes… Y llegamos a la portiella que dixebra los conceyos de Piloña y Casu. Equí les fayes lleguen hasta los 40 metros d’altor, anque la xente se fixase más na plantación de pinos americanos (sí, mui guapinos, pero ellí nun pegaben).
El valle cada vez se va faciendo más estrechu y la vexetación reduzse a ablanos y texos hasta llegar a la imponente foz. Enriba, con nieve, nun mos quedó otra que comer el bocadillu de pie al lláu de lo que camentamos yeren los pegoyos d’un pasu de madera antiguu del ríu.
Fartucos, de vuelta a Espinaréu (al chigre, cómo non) comentando qu’en tol día nun viéramos nin un corzu, nin un gochu xabaz, nin un triste esguil. Bueno sí, vimos un ferreiru pero, pa la cantidá de páxaros que sintíamos, nun vimos más.
Monte Espinaréu Muñacos XEGA Llar Solidariu Ríu Infiernu Piloña Casu L'Infiestu Rifabar Degoes La Pesanca GPX